Коронавируст /Ковид-19/ цар тахлын халдвараас урьдчилан сэргийлэх ажлыг эрчимжүүлэх тухай
Коронавируст /Ковид-19/ цар тахлын шинээр үүссэн нөхцөл байдалтай холбогдуулан Улсын Онцгой комисс 01:00 цагт хуралдаж Хот хоорондын тээвэр, орон нутгийн тээвэр, суудлын галт тэрэгний хөдөлгөөнийг 2020 оны 11 дүгээр сарын 13-ны өдрийн 23:00 цаг хүртэл түр зогсоох, бүх шатны боловсролын байгууллагын үйл ажиллагааг тус тус зогсоох шийдвэр гарсан.
Дээрх шийдвэрийн хүрээнд Нийслэлийн Онцгой комисс 03:00 цагт хуралдаж тодорхой шийдвэрүүдээр захирамж гаргалаа.
1. Олон нийтийг хамарсан арга хэмжээ зохион байгуулах, согтууруулах ундаа худалдах, түүгээр үйлчилгээ эрхлэх тусгай зөвшөөрөлтэй хүнсний худалдаа, үйлчилгээний газрууд үйл ажиллагаа явуулах цагийн хязгаарыг 07:00-22:00 цаг хүртэл тогтоож, дээрх хязгаарласан хугацаанд согтууруулах ундаагаар үйлчлэхгүй, худалдахгүй байх.
2. Нийтийн тээврийн үйлчилгээг өглөө 06:00-10:00 цаг, орой 17:00-21:00 цагуудад тусгай хуваарьт шилжүүлж, амны хаалтгүй иргэнд үйлчлэхгүй байх, ариутгал халдваргүйжүүлэлтийг тогтмол зохион байгуулах.
3. Төр хувийн хэвшлийн аж ахуй нэгж байгууллагаар үйлчлүүлж байгаа иргэд болон ажиллагсдын биеийн халууныг тогтмол үзэж нэвтрүүлэх, гарыг ариутгах, амны хаалтын хэрэглээг хэвшүүлэх.
4. Төр хувийн хэвшлийн байгууллагууд 12 хүртэлх насны хүүхэдтэй эхчүүд /ганц бие эцэг/-д байгууллагын хэвийн үйл ажиллагааг алдагдуулахгүйгээр гэрээсээ цахимаар ажиллах боломжийг бүрдүүлж, цалин хөлсийг ажилласанд тооцож олгохыг байгууллагын удирдлагуудад зөвлөж байна.
Нөөц хангалтын талаар:
Нийслэл хотын хэмжээнд “Коронавируст (КОВИД-19) халдварын цар тахлын үед эрүүл мэндийн чиглэлээр 1423 ор, 1518 эмч, эмнэлгийн ажилтан ажиллах нөөц байна.

Нийслэлийн хүн амын хүнсний хэрэглээний 45-60 хоногийн нөөцтэй байна.

Захирамжийн хүрээнд Баар 945, Согтууруулах ундаа худалдах тусгай зөвшөөрөлтэй 3731 ААН, Согтууруулах ундаа үйлчлэх тусгай зөвшөөрөлтэй 1246 ААН, сүлжээ болон түргэн хоолны газар, цайны газар 1001, хүнсний зах худалдааны төв 68, барааны худалдааны төв 188 аж ахуй нэгж байгууллагууд цагийн хязгаарлалт зохицуулалтад хамрагдаж байна.
#Маскаа зүүе
#Гараа ариутгая
#Хамтдаа Covid-19-ийн эсрэг нэгдэцгээе